ខេត្តកំពង់ធំ ៖ កាលពីថ្ងៃទី២១ ខែមេសា ឆ្នាំ២០២៣កន្លងមក នៅបញ្ជាការដ្ឋានកងរាជអាវុធហត្ថខេត្តកំពង់ធំ បានរៀបចំពិធីសំណេះ សំណាល និងជូនដំណើរយោធិនប្រឡងជាប់ស្ថាពរជាកងរាជអាវុធហត្ថ ចូលហ្វឹកហ្វឺននៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ក្រោមអធិបតីភាពឯកឧត្តម ងួន រតនៈ អភិបាលនៃគណៈអភិបាលខេត្តកំពង់ធំ និងលោកឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ ។
ក្នុងពិធីសំណេះសំណាលនេះ ក៏មានការអញ្ជើញចូលរួមពីសំណាក់លោកមេបញ្ជាការរង នាយ-នាយសេនាធិការរង, ប្រធាន-អនុប្រធានមន្ទីរ, នាយការិយាល័យ និងមេបញ្ជាការមូលដ្ឋានអាវុធហត្ថក្រុង ស្រុក នាយ-នាយរងកងរាជអាវុធហត្ថ ព្រមទាំងឪពុកម្តាយ អាណាព្យាបាល របស់យោធិនប្រឡងជាប់ងផងដែរ ។
នាឱកាសនោះដែរ ឯកឧត្តមអភិបាលខេត្តក៏បានផ្តាំផ្ញើដល់ប្អូនៗដែលបានប្រឡងជាប់ស្ថាពរជាយោធិននៃកងរាជអាវុធហត្ថ បន្ទាប់ពីចូលទៅសាលាហ្វឹកហ្វឺន ត្រូវតែខិតខំប្រឹងប្រែងរៀនសូត្រគ្រប់មុខវិជ្ជាឲ្យបានល្អប្រសើរ ។ ជាមួយគ្នានោះ ឯកឧត្តមអភិបាលខេត្តក៏បានឧបត្ថម្ភដល់យោធិនទាំង៥០នាក់ ក្នុងម្នាក់ៗទទួលបានថវិកាចំនួន ២០០.០០០រៀល ៕
