ខេត្តកំពង់ធំ ៖ នារសៀលថ្ងៃទី០៧ ខែធ្នូ ឆ្នាំ២០២៣ កម្លងមកនេះឯកឧត្តម ងួន រតនៈ អភិបាលខេត្តកំពង់ធំ បាននាំយកសម្ភារៈសិក្សាចែកជូនសិក្សានុសិស្សចំនួន៥២៤នាក់ នៅសាលាបឋមកំពង់ធំនិងអនុវិទ្យាល័យកំពង់រទេះ ក្រុងស្ទឹងសែន ខេត្តកំពង់ធំ ។
នៅក្នុងឱកាសនោះដែរ ឯកឧត្តមអភិបាលខេត្តបានថ្លែងថាកុមារគឺជាធនធានមនុស្សដ៏សំខាន់ ហើយក៏ជាទំពាំងស្នងឬស្សី ដែលមិនអាចខ្វះបានសំរាប់ការអភិវឌ្ឍប្រទេសជាតិនាពេលអនាគត ហេតុនេះយើងត្រូវតែផ្តល់កិច្ចការពារ និងអភិវឌ្ឍកុមារអោយបានល្អប្រសើរ ។
ជាមួយនេះដែរ ឯកឧត្តមក៏បានថ្លែងអំណរគុណផងដែរដល់លោកនាយក លោកគ្រូ អ្នកគ្រូ ដែលបានខិតខំយកចិត្តទុកដាក់អស់ពិកម្លាំងកាយកម្លាំងចិត្តក្នុងការបង្ហាត់បង្រៀន សិក្សានុសិស្សរហូតទទួលបានលទ្ធផល គួរអោយមានមោទនភាពគ្រប់ៗគ្នា ក៏ដូចជាការឆ្លើយតបទៅនឹងគោលនយោបាយរបស់ក្រសួងអប់រំយុវជននិងកីឡាក៏ដូចជាយុទ្ធសាស្ត្ររបស់រាជរដ្ឋាភិបាល ក្រោមការដឹកនាំរបស់សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
ឯកឧត្តមអភិបាលខេត្តក៏បានជម្រុញដល់អាជ្ញាធរមូលដ្ឋានចុះត្រួតពិនិត្យប្រព័ន្ធលូបង្ហូរក្នុងសាលា ដើម្បីរំដោះទឹកភ្លៀងនៅក្នុងរដូវវស្សានៅឆ្នាំក្រោយ ដើម្បីមានភាពងាយស្រួលដល់សិក្សានុសិស្សនិងលោកគ្រូ អ្នកគ្រូផងដែរ ។
គួរបញ្ជាក់ផងដែរថា សិក្សានុសិស្សដែលទទួលបានសម្ភារៈទាំង៥២៤នាក់ស្រី២៥៣នាក់ក្នុងនោះមានសិក្សានុសិស្សបឋមសិក្សា៣៤៤នាក់ សិស្សស្រី១៦៩នាក់ និងសិស្សានុសិស្សអនុវិទ្យាល័យ១៨០នាក់ សិស្សស្រី៨៤នាក់ សម្ភារៈសិស្សារួមមាន សៀវភៅ២១០០ក្បាល ប៊ិច៣៥០ដើម និងទឹកប្រាក់ឧបត្ថម្ភចំនួន១,០០០,០០០រៀល ។
