ខេត្តបន្ទាយមានជ័យ ៖ នៅព្រឹកថ្ងៃទី ០៧ ខែមីនា ឆ្នាំ២០២៣ លោក រ័ត្ន ដាស៊ីណង់ អភិបាលស្រុកមង្គលបុរី និងជាប្រធានអនុសាខាកាកបាទក្រហមកម្ពុជា ស្រុក ព្រមទាំងលោក ពិន សេងហាប់ អភិបាលរងស្រុក និងជាអនុស្រុកប្រធានសាខាកាកបាទក្រហមស្រុក បានដឹកនាំសមាជិក សមាជិកា ក្រុមការងារអនុសាខាស្រុក បាននាំយកអំណោយមនុស្សធម៌របស់អនុសាខាស្រុក និងថវិកាមួយចំនួន ចុះសួរសុខទុក្ខ និងចូលរួមមរណទូក្ខគ្រួសារនៃសពក្មួយប្រុស ធឿន ចាន់ធីម អាយុ ៦ឆ្នាំ ស្លាប់ដោយសារលង់ទឹកស្ទឹងខាងក្រោយផ្ទះកាលពីថ្ងៃទី០៣ ខែមីនា ឆ្នាំ២០២៣ ស្ថិតនៅក្នុងភូមិពោធ៍២ដើម ឃុំរហាត់ទឹក ស្រុកមង្គលបុរី ខេត្តបន្ទាយមានជ័យ ។
អំណោយ និងថវិការបស់អនុសាខាស្រុករួមមានៈ អង្ករ ៥០គីឡូក្រាម, មី ១កេះ, ទឹកក្រូច ១យួរ, ទឹកស៊ីអុីវ ១យួរ, ត្រីខ ១យួរ, ទឹកត្រី ១យួរ, ទឹកសុទ្ធ ៥យួរ, គ្រឿងបរិក្ខារផ្ទះបាយ ១ឈុត ឃីត និងគ្រឿងទេស ១ថង់, មុង ១ សារ៉ុង ១ និងថវិកា ១៥ម៉ឺនរៀល ថវិការដ្ឋបាលឃុំរហាត់ទឹក ចំនួន ១០ម៉ឺនរៀល, លោក អេង ប្រសិទ្ធ អនុប្រធានការិយាល័យ ដ.ន.ស.ភ ស្រុកមង្គលបុរី ៥ម៉ឺនរៀល សរុបទឹកប្រាក់ទាំងអស់ចំនួន ៣០ម៉ឺនរៀល ។
នាឱកាសនោះដែរ លោក រ័ត្ន ដាស៊ីណង់ ប្រធានអនុសាខាកាកបាទក្រហមស្រុក បានពាំនាំអនុសាសន៍សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សាកសួរសុខទុក្ខ និងសូមអំពាវនាវដល់ឪពុកម្ដាយ ដែលជាអាណាព្យាបាលកូនៗ តូចៗ ជាពិសេសដែលរស់នៅក្បែរដងស្ទឹង ត្រូវប្រុងប្រយ័ត្នអោយបានខ្ពស់បំផុត ៕
